In nomine Domini. Amen. Anno incarnationis ejusdem millesimo ducentesimo nonagesimo septimo, indictione undecima, die veneris post festum beati Nicolai hyemalis, per presens publicum instrumentum cunctis appareat evidenter, quod in presentia mei Petri de Monte Biligardi, sacrosancte Romane ecclesie ac sacri imperii et alme urbis prefecti auctoritate publici notarii et testium subscriptorum, reverendus pater domnus Bertrandus, Dei gratia abbas Cluniacensis, vocato coram se discreto viro magistro Aymone de Cranceto, clerico, qui ex parte illustris viri domini Reynaudi de Burgundia, comitis Montis Biligardi, venerat ad dictum reverendum patrem apud Cluniacum, cum quibusdam litteris de credencia, quarum tenor talis est: «A religiose persone et honeste, à sont soignour, à Bertran par la grace de Deu abbé de Cligney, Renauz de Borgoigne, cuens de Montbeliart, salut et amor. Nos vos mandons que vos croiez maistre Ayme dit Crancet, nostre clerc, portour de ceste lettre, de totes les choses que il vos dira de part nos. En tesmoignage de laquel chose, nos vos anvoyons ces overtes lettres saelées de notre seal. Données à Binant, lou mardi aprez la Seint Nicolas d'yver, l'am MCC nonante sept», prefato magistro Aymoni monstrando requestam et oblationem quas ex parte dicti domini comitis dicto domino abbati jam fecerat, dixit et exposuit idem domnus abbas quod per dictas litteras de credencia dicti comitis et ex parte ipsius comitis sibi tetigerat de duobus; requirendo primo dictum domnum abbatem, quod priorem de Ledone, quem in prejudicium dicti comitis et jurisdictionis sue, ut dicebat dictus magister Aymo, et ipso comite minime requisito, dictus reverendus pater ceperat aut capi fecerat, deliberaret aut redderet, si faciendum videret et bono modo fieri posset. Secundo dixit idem domnus abbas quod idem magister Aymo sibi tetigerat et ex parte dicti domini comitis obtulerat quod idem dominus comes se paratum offerebat dicto reverendo patri et suis non solum super captione et detentatione dicti prioris, set ad capiendum et adrestandum, nomine dicti domini abbatis et pro eo, quoscumque alios priores et monachos Balmenses, necnon et quoslibet alios priores et monachos Cluniacensis ordinis inobedientes et rebelles dicto reverendo patri aut ordini suo, abbate Balmense dumtaxat excepto, necnon ad introducendum domnum reverendum patrem et suos in monasterio Balmensi pro visitando et corrigendo, dare consilium, auxilium et juvamentum, cum ab ipso aut suis dictus dominus comes fuerit requisitus. Que omnia dictus magister Aymo clericus ex parte dicti domini comitis requisisse, dixisse et dicto domno abbati obtulisse constanter asseruit et etiam recognovit coram me notario predicto et testibus infrascriptis. Ad primum autem respondit dictus reverendus pater, quod in captione dicti prioris de Ledone non credebat, nec intendebat dicto domino comiti aut jurisdictioni sue in aliquo prejudicasse, nec quicquam in hac parte fecisse ex quo dictus domnus comes deberet contra eumdem reverendum patrem aut suum ordinem moveri aliquathenus aut turbari, maxime cum in districtu suo et jurisdictione sua captus non fuerat dictus prior, cumque etiam idem prior de Ledone eidem reverendo patri sit et fuerit inobediens, pertinax et rebellis, multisque sit criminibus, reatibus et excessibus manifeste et publice irretitus. Dictus reverendus pater, ut dicebat, eumdem priorem qui pro manifestis offensis suis commissis et sceleribus captus fuerat, salva consciencia sua liberare aut reddere non poterat nec debebat, potissime cum secundum consuetudines, statuta et privilegia sui ordinis predicti, nedum dictum priorem de Ledone, sed quemcumque abbatem, priorem aut monachum Cluniacensis ordinis, rebelles et inobedientes taliter aut consimiliter committentes, abbas Cluniacensis etiam in palatio imperatoris au[t] regis aut cujuslibet principis seu potentis arrestare potest libere, capere et saisire. Ad secundum, quod dictus magister Aymo dicto reverendo patri tetigerat ex parte ipsius domini comitis, dicto domno Cluniacensi obtulerat de dando videlicet consilio, auxilio et favore eidem reverendo patri, non solum super ista captione dicti prioris de Ledone, si in capiendo et adrestando quoscumque alios priores et monachos Cluniacenses et Balmenses rebelles et inobedientes, persona abbatis Balmensis excepta, cum esset idem comes a dicto abbate Cluniacensi aut suis gentibus requisitus, grates et gracias multiplices dicto magistro Aymoni et per eum dicto domino comiti egit et retulit reverendus pater predictus et super hoc intendit, ut dicebat, dictum dominum comitem locis suis et temporibus requirere et rogare. Premisse autem requesta et oblacio, quas dictus magister Aymo dicto reverendo patri ex parte dicti domini comitis fecit et obtulit, necnon responsiones dicti reverendi patris ad predicta, prout superius premittitur, cum omnibus et singulis predictis recitate fuerint, confessate et recognite coram me notario predicto et testibus infrascriptis. Acta fuerunt predicta apud Cluniacum, juxta gradus camere reverendi patris supradicti, anno, die et indictione quibus supra, presentibus fratribus Guichardo priore majore et Johanne decano Cluniensibus, Odone priore de Longo Ponte, Durando de Marcigniaco, et Guillelmo Giliberti de Lingonis clericis, et pluribus aliis monachis et clericis ad hoc testibus vocatis specialiter et rogatis. Rogans et requirens dictus reverendus pater predictos viros religiosos, videlicet fratres Guichardum priorem et Johannem decanum Clunienses, ac Odonem, priorem de Longo Ponte, ut ipsi sigilla sua una cum signo mei notarii infrascripti apponant in testimonium omnium premissorum. Nos vero fratres Guichardus, prior major, etc. Et ego Petrus dictus Juvenis de Monte Biligardi, etc.